XIII республикатааҕы учууталлар уонна педагогическай общественность съеһэ
Алтынньы ый 5-9 күннэригэр Дьокуускайга Саха Республикатын учууталларын уонна педагогическай общественноһын съеһэ буолан ааста. Съезкэ 527 делегат, 39 олохтоох дьаһалта салайааччылара, 29 общественнай тэрилтэлэртэн, ону таһынан Данияттан, Японияттан ыалдьыттар, ученайдар, учууталлар Бүтүн Россиятааҕы конкурстарын финалистара, кыайыылаахтара, кыттыыны ыллылар.
Съезд программатынан үөрэхтээһин сүрүн хайысхаларын тула кэпсэтии ыытылынна:
— маастар кылаастар, панельнай дискуссиялар, лексиялар, төгүрүк остуоллар ыытыллыннылар;
— выставка-форум тэрилиннэ;
-Дьокуускай куорат оскуолаларыгар, детсадтарыгар сылдьан үлэ уопутун атастаһыы барда;
— ведомственнай тэрилтэлэргэ аһаҕас кэпсэтиилэр бардылар о.д.а
Съезд үлэтэ оҕо туһугар үөрэхтээһин, общество – бары бииргэ түмсэн үлэлиир хайысхаларын торумнуурга ананна. Ол курдук съезд үөрэхтээһин эйгэтэ 2030 сылга дылы сайдыытын ырытыһыы, сүбэлэһии, санаа атастаһыыта үрдүк таһымнаахтык ыытылынна.
Оройуонтан 6 делегат талыллан съезкэ кыттыыны ыллыбыт: Иванова М.Х. (МКУ ОРУО начальнига), Стручкова А.А.(ОСОШ), Иванова С.П. (ХСОШ), Фалеева М.Н.(ЭАСОШ), Куонака Уйгун Тургун уола (ЖСОШ). Бу съезкэ оскуола директордара Васильев А.П, Кайдалова Е.Г. кыттыыны ыллылар.
Программа быһыытынан бары тэрээһиннэргэ сырыттыбыт. Элбэҕи көрдүбүт, иһиттибит.
Бастакы күн: Республикаҕа учуутал күнүгэр анаммыт митиҥҥэ сырыттыбыт. Бу тэрээһиҥҥэ общественность, съезд делегаттара, ыалдьыттара уонна Педагогическай институт студеннара кыттыыны ыллылар, ол кэнниттэн куорат оскуолаларыгар тарҕастыбыт. Биһиги 5, 23 нүөмэрдээх оскуолаларга, техническэй лицейгэ, “Радуга” детсадка сылдьан үлэ уопутун атастастыбыт;
Иккис күн: М.К.Аммосов аатынан СВФУ үлэтин-хамнаһын билсистибит, экскурсияларга сырыттыбыт. Күн иккис аҥарыгар Арктика улуустарын учууталлара мустан уопут атастастыбыт уонна баар проблемаларга тохтоон кэпсэттибит. Кэпсэтиигэ Голомарева Е.Х, Ил-Түмэн гос.мунньаҕын депутата кыттыыны ылан, боппуруостарга эппиэттээтэ, сүбэлэри биэрдэ.
Үһүс күн: Выставка – форум «Открытое образование: диалог, деятельность, доступность» киэҥ далааһыннаахтык ыытылынна. Бу быыстапкаҕа оройуон үөрэхтээһинин тэрилтэлэрин үлэлиир хайысхаларын бырайыактарын кэпсээтибит, ону таһынан оҕолорбут оҥоһуктара туруорулуннулар. Быыстапкабытын, бырайыактарбытын элбэх көрөөччү сэҥээрдэ, уопут атастаста. Ордук муостан оҥоһуктары, национальнай оонньуур көрүҥнэрин технологияларын ыйыталастылар. Күндү ыалдьыттарынан бастакы Президент М.Е.Николаев, үөрэх министрэ Ф.В.Габышева буоллулар.

Күн иккис аҥарыгар “Открытая школа” диэн теманы тула төгүрүк остуол аһаҕас кэпсэтиигэ кыттыыны ылбыппыт. Кэпсэтиигэ д.п.н.,профессор Цирульников А. М., к.п.н, Бугаев Н. И. кыттыыны ылбыттара.
Төрдүс күн: ученайдар уонна учууталлар Бүтүн Россиятааҕы конкурстарын финалистарын, кыайыылаахтарын лекцияларын иһиттибит. Кыттыыны ыллылар араас сылларга кыайыылааҕынан ааттаммыт учууталлар: Демахин Александр Александрович (Москва)-2012, Баскевич Ирина Александровна (Пермь-2012), Яковлев Гаврил Михайлович (Чурапча-1993), Леханова Феня Матвеевна (Иенгра – 2000). Үөрэхтээһин хаамыытын, саййдыытын тула кэпсэтии ыытылынна. Кэпсэтиини иилээн-саҕалаан ыытта Алексеева Г.И.( ИРОиПК директора).
Бэһис күн: Опера уонна балет театрыгар Пленарнай мунньах ыытыллыбыта. Республика Ил-Дархана Е.А.Борисов, бастакы президент М.Е.Николаев, үөрэх министрэ Ф.В.Габышева республикаҕа үөрэхтээһин хаамыытын, ситиһиилэрин кэпсээтилэр, инники үөрэхтээһин эйгэтэ 2030 сылга дылы сайдыытын соруктарын, хайысхаларын ыйдылар. Кэпсэтиигэ элбэх үлэ уопута иһилиннэ, былааннаммыт тэрээһиннэр үлэлэрин түмүктэрэ, ол кэнниттэн правительственнай наҕараадалары туттарыы үөрүүлээх быһыыга-майгыга ыытылынна.
Итини таһынан Өлөөн уонна Эвен-Бытантай оройуоннарын делегаттара Саха Республикатын Государственнай мунньаҕын (Ил-Түмэн) председателин А.Н. Жиркову кытта уонна Верхоянскай оройуон делегаттарын кытта Саха Республикатын Арктика улуустарын государственнай комитетын салайар Киселеву А.В кытта атах тэпсэн олорон, ис дууһабытыттан кэпсэттибит, баар проблемаларга тохтоон сүбэ-ама ыллыбыт.
Съезд туруорбут соруктарын толорууга, республикабыт социально-экономическай сайдыытыгар күүскэ үлэлэһии хас биирдии учуутал уонна педагогическай общественность инники соруга буолуохтаах.
Түмүкпэр, делегатынан талыллан маннык улахан тэрээһиннэргэ сылдьар кыаҕы биэрбит Өлөөн орто оскуолатын пед.коллективыгар, администрациятыгар, МКУ ОРУО начальнигар М.Х.Ивановаҕа барҕа махталбын тиэрдэбин. Съезд делегаттарыгар үлэлэригэр өссө да ситиһиилэри баҕарабын.

XIII съезд делегата Стручкова А.А.
Өлөөн орто оскуолата.

XIII республикатааҕы съезд